შუახევის მუნიციპალიტეტის მერის, ომარ ტაკიძის ხელმძღვანელობით, მუნიციპალიტეტის სტიქიისა და სოციალურ საკითხთა კომისიის სხდომა გაიმართა.

სხდომას მერის მოადგილეები მირიან აბაშიძე, გიორგი კეკელიძე, მერიის ჯანმრთელობისა და სოციალური დაცვის სამსახურის თანამშრომლები და კომისიის წევრები ესწრებოდნენ.

სხდომაზე დღის წესრიგით გათვალისწინებული საკითხები განიხილეს. ხელმძღვანელმა პირებმა მოისმინეს ინფორმაცია მუნიციპალიტეტში მოქმედი ჯანმრთელობისა და სოციალური დაცვის პროგრამების 2026 წლის მეორე კვარტლის შესრულების შესახებ, შეაფასეს პროგრამების მიმდინარეობა და მოქალაქეთა საჭიროებებზე მათი ხელმისაწვდომობა.

შუახევის მუნიციპალიტეტის მერია მიმდინარე წელს 25 მიზნობრივ პროგრამას ახორციელებს, რომელთა საერთო ბიუჯეტი 3 421 200 ლარს შეადგენს. წლის დასაწყისიდან დღემდე აღნიშნული პროგრამებით 3 000-ზე მეტმა მოქალაქემ ისარგებლა.

წარმატებით ხორციელდება მედიკამენტებით უზრუნველყოფის პროგრამა. მუნიციპალიტეტი მხარდაჭერას უწევს განსაკუთრებული საჭიროებების მქონე ბავშვიან ოჯახებს, მრავალშვილიან ოჯახებს, მარტოხელა მშობლებს, შშმ პირებსა და ონკოლოგიურ პაციენტებს. ასევე ხორციელდება მრავალშვილიანი ოჯახების სტუდენტი წევრების ეკონომიკური მხარდაჭერის პროგრამა.

საცხოვრებელი სახლების მქონე და უსახლკარო ოჯახების ერთჯერადი ფინანსური დახმარების პროგრამის ფარგლებში დახმარებას 12 ოჯახი მიიღებს, ხოლო საცხოვრებელი სახლების სახურავების შეძენის პროგრამით 150-ზე მეტი ადგილობრივი ისარგებლებს.

მოქალაქეებს, რომლებიც ჯანმრთელობისა და სოციალური დაცვის პროგრამებით განსაზღვრულ კრიტერიუმებს ვერ აკმაყოფილებენ, საჭიროების შემთხვევაში დახმარება მერის სარეზერვო ფონდიდან გაეწევათ.